Breis is €500k bronnta chun tacú le féilte agus imeachtaí áitiúla ar fud Fhine Gall i 2025

Tá leithdháileadh maoinithe de €525,000 fógartha ag Aonad Imeachtaí Chomhairle Contae Fhine Gall ar 101 grúpa agus eagraíocht ar fud an chontae mar chuid dá Chlár Maoinithe d’Fhéilte agus Imeachtaí do 2025.

Cabhróidh an maoiniú le tacaíocht a thabhairt do raon leathan imeachtaí spreagúla ceoil, spóirt agus cultúrtha, a spreagfaidh rannpháirtíocht phobail, turasóireacht, agus beogacht réigiúnach sna míonna atá amach romhainn. Beidh ról lárnach ag na himeachtaí seo maidir le cultúr ilghnéitheach an chontae agus na rudaí atá ar fáil sa phobal a léiriú, agus cabhróidh siad le borradh a chur faoin ngeilleagar áitiúil.

Gach bliain faigheann breis agus 100 imeacht ar fud réigiún Fhine Gall tacaíocht airgeadais ón Aonad Imeachtaí, idir mórfheilte ceoil agus amharclainne agus féilte bia mara, imeachtaí samhraidh agus paráidí. Cruthaíonn na himeachtaí seo deiseanna sárluachmhara chun na healaíona, spóirt, bia, stair, agus siamsaíocht a cheiliúradh agus mórtas pobail a chothú ag an am céanna. 

Dúirt Méara Fhine Gall, Brian McDonagh: "Táim thar a bheith bródúil as ár bpobal a fheiceáil ag teacht le chéile bliain i ndiaidh bliana chun raon imeachtaí chomh héagsúil a óstáil. Cinnteoidh an maoiniú €525,000 go leanfaidh le rath na n-imeachtaí seo agus go dtabharfaidh siad cúis áthais d’Fhine Gall. Táim ag súil go mór lenár gcónaitheoirí agus cuairteoirí a fheiceáil ag baint sult as gach a bhfuil ar fáil i 2025."

Dúirt Príomhfheidhmeannach Chomhairle Contae Fhine Gall, AnnMarie Farrelly: “Táimid thar a bheith buíoch tacaíocht airgeadais a chur ar fáil don réimse leathan grúpaí agus eagraíochtaí chun neart imeachtaí iontacha a óstáil i mbliana, mar go bhfuil siad ríthábhachtach d’fhorbairt shóisialta agus eacnamaíoch an chontae. Cuireann na himeachtaí seo ardáin ar fáil do thallann áitiúil, cuireann siad le turasóireacht, agus tugann siad daoine le chéile chun ceiliúradh a dhéanamh ar na nithe a dhéanann Fine Gall chomh speisialta sin.”

I measc na mbuaicphointí iomadúla i bhféilire imeachtaí 2025 tá paráidí Lá Fhéile Pádraig a bhfuiltear ag súil go mór leo agus a meastar a mheallfaidh sluaite móra arís eile mar go gcuireann siad eispéireas cultúrtha spreagúil ar fáil do dhaoine áitiúla agus turasóirí araon. Beidh seacht gcinn acu sin ar siúl ar fud Fhine Gall ar an 17 Márta.

Mar chuid den phróiseas maoinithe, beidh ar iarrthóirí rathúla páirt a ghlacadh i Modúl Oiliúna Imeachtaí, cinnteoidh an oiliúint seo go mbeidh na scileanna agus an t-eolas riachtanach ag lucht eagraithe imeachta chun imeachtaí sábháilte, rathúla agus inbhuanaitheacha a reáchtáil.

Agus a chlár mórimeachtaí don bhliain 2025 eisithe, léiríonn sé féilire lomlán le himeachtaí spreagúla le fiosrú ag gach duine. Idir imeachtaí míchlúiteacha an tsamhraidh de chuid Blas Fhine Gall, Proms Fhine Gall, Ceolchoirmeacha Chaisleán Shoird agus Reigé agus Gormacha Bhinn Éadair agus Féile Muirí agus Bia Mara Bhinn Éadair, Féile Tine Fhine Gall agus Margaí Nollag agus Soilsiú Crann sna míonna níos fuaire, tá rud éigin sa chlár do gach duine, ag cinntiú féilire bríomhar gníomhaíochtaí ar feadh na bliana ar féidir le gach duine taitneamh a bhaint astu.

Fan ar an eolas faoi na himeachtaí spreagúla go léir atá ag tarlú i bhFine Gall trínár gcaineáil meán sóisialta a leanúint, nó trí chuairt a thabhairt ar eventsinfingal.ie chun a fháil amach cad atá ar siúl.

Féach miondealú ar an maoiniú go léir a leithdháileadh