Dámhachtainí Fhine Gall do Phobail Níos Glaise 2019

Ar an Déardaoin, an 3 Deireadh Fómhair, 2019, réachtáladh Dámhachtainí Fhine Gall do Phobail Níos Glaise i Halla an Chontae, Sord.  Le himeacht na mblianta, tá an comórtas tábhachtach seo i ndiaidh cur leis an gcaidreamh atá ag Comhairle Contae Fhine Gall le cónaitheoirí, grúpaí pobail agus daoine aonair sa chontae.  I láthair ar an oíche bhí Méara Fhine Gall, an Comhairleoir Eoghan O’Brien agus Príomhfheidhmeannach Chomhairle Contae Fhine Gall, AnnMarie Farrelly. 

I mbliana, leagadh béim ar líon na bpailneoirí agus bithéagsúlacht a mhéadú agus ar phobail inbhuanaithe a chothú, príomhról ar féidir linn ar fad a bheith páirteach ann chun todhchaí níos inbhuanaithe a chruthú. Chomh maith leis sin, spreagadh pobail chun ról níos mó a bheith acu inár bhfreagairt chomhshaoil d’athrú aeráide agus d’fheabhsuithe comhshaoil.

Bhí an méid seo a leanas le rá ag Méara Fhine Gall, Eoghan O’Brien: “Cothaíonn dámhachtainí na bPobal Níos Glaise spiorad pobail iontach - ba cheart dúinn a bheith fíorbhuíoch de na daoine a spreagann an chuid eile againn a bheith mórtasach as ár dtimpeallacht”. 

Bhí an méid seo a leanas le rá ag an bPríomhfheidhmeannach, AnnMarie Farrelly, “I mbliana bhí an caighdeán níos airde ná riamh roimhe seo agus is aitheantas leanúnach é don imní agus don bhród atá ar chónaitheoirí, grúpaí pobail agus daoine aonair i bhFine Gall maidir leis an timpeallacht ina bhfuilimid ag obair agus ag maireachtáil”.

I measc na ndaoine a bhronn dámhachtainí bhí Craig Benton, Benton Ecological Solutions, Roger Warburton, Rediscovery Centre, Baile Munna, John Daly, Stiúrthóir Gníomhach na Roinne Comhshaoil, Gníomhú ar son na hAeráide agus Seirbhísí Uisce, agus Fionnuala May, Ailtire Contae, Comhairle Contae Fhine Gall.

Ghlac go leor grúpaí pobail as ar fud Fhine Gall páirt san imeacht i mbliana, agus bhí breis is 100 iontrálaí ar fad ann ó chatagóirí éagsúla, idir an Dámhachtain don Ghairdín is Fearr ag Tosach an Tí agus an Dámhachtain Bithéagsúlachta.  Bronnadh 40 duais ar fad ar an oíche. Bronnadh an duais mhór ar Fhoireann BhainistíochtaEastát Bhaile an Fhaoitigh as an obair iontach atá déanta acu agus as a dtiomantas dá gceantar.

Thagair Sinead Fox agus Carla McKenna, Oifigigh Oideachais Comhshaoil, a d’eagraigh an t-imeacht, don obair mhór a rinne na hiarratasóirí ar fad, agus thréaslaigh siad leo siúd ar bronnadh dámhachtainí orthu. “Is dlúthchuid den saol é an bhithéagsúlacht, agus tá ról againn ar fad i gcosaint agus i bhfeabhsú na bithéagsúlachta atá inár gcontae féin. Go raibh maith agaibh ar fad as cabhrú linn ócáid den scoth a reáchtáil.”

Seo thíos liosta de na buaiteoirí ar fad:

Buaiteoirí na Príomhdhuaise, Foireann Bhainistíochta Eastát Bhaile an Fhaoitigh - Robyn Ashe, Joseph Bennett agus Samantha Hanna, leis an bPríomhfheidhmeannach Annemarie Farrelly agus Méara Fhine Gall Eoghan O'Brien, ag Searmanas na nDámhachtainí do Phobail Níos Glaise i gComhairle Contae Fhine Gall.