Fáiltíonn Fine Gall roimh Mhaoiniú faoi Scéim na Mol Nasctha

Tá áthas ar Chomhairle Contae Fhine Gall fáilte a chur roimh mhaoiniú €115k faoi Scéim na Mol Nasctha #OurRuralFuture a chabhróidh le cianobair a éascú. D’fhógair an tAire Forbartha Tuaithe agus Pobail, Heather Humphreys TD, maoiniú de bhreis agus € 8.8 milliún faoi Scéim na Mol Nasctha - ceann de phríomhspriocanna  Thodhchaí Cheantair Thuaithe na hÉireann.

Neartóidh an maoiniú moil agus pointí ceangail leathanbhanda atá ann cheana agus cuirfidh sé le bonneagar cianoibre i ngach réigiún ar fud na hÉireann. Cabhróidh deontais freisin le moil chun bearta a dhéanamh le dúshláin a bhaineann le COVID a láimhseáil. Tá moil chianoibre Fhine Gall ag tnúth le páirt a ghlacadh san ardán náisiúnta nua linkedhubs.ie, áit ar féidir le cianoibrithe spás agus seirbhísí a chur in áirithe i moil chianoibre ar fud na tíre.

Cabhróidh an deontas € 75,000 arna urrú ag Base Enterprise Center le hinfheistíocht atá á déanamh cheana san ionad chun áiseanna a uasghrádú agus an spás laistigh den ionad a dhéanamh níos inrochtana agus oiriúnach do chianoibrithe, do ghnólachtaí nuathionscanta agus do ghnó seanbhunaithe i gceantar Fhine Gall.

Feabhsóidh an maoiniú a chuirfear ar fáil bonneagar cianoibre ag na Pointí Ceangail Leathanbhanda atá ann cheana in Ionaid Pobail Fhine Gall Liam Rogers, Coill na nÚll, Baile an Tirialaigh agus Baile Lotrail. Cuirfidh na hionaid sin spás ar fáil d’fhir agus do mhná gnó an cheantair, do dhaltaí agus d’fhiontraithe chun cianobair a dhéanamh ina gceantar féin i dtimpeallacht shábháilte, chairdiúil fháilteach. Tabharfaidh an maoiniú sin cead stáisiúin oibre, scáileáin agus uasghráduithe teicneolaíochta a shuiteáil chun na háiseanna sin a fheabhsú.

Seo mar a labhair Méara Fhine Gall, an Comhairleoir Seána Ó Rodaigh agus í ag cur fáilte roimh an bhfógra: “Is mór an scéala é an maoiniú seo don iliomad oibrithe i bhFine Gall a d'aithin na buntáistí a bhaineann le cianobair le bliain anuas. Tabharfaidh sé deis dóibh a bheith ag obair ina gceantar féin agus leas a bhaint as áiseanna agus tacaíochtaí a bhaineann le timpeallacht oifige."

Seo mar a labhair Príomhfheidhmeannach Fhine Gall, AnnMarie Farrelly: “Tá Comhairle Contae Fhine Gall tiomanta do dheiseanna digiteacha a fheabhsú i bhFine Gall agus forbairt samhlacha oibre inbhuanaithe a éascú. Fáiltímid roimh an maoiniú seo a chuirtear ar fáil dár moil chianoibre a chuireann le cothromaíocht oibre is saoil níos fearr, atá tairbheach don gheilleagar áitiúil agus a chabhraíonn le hoibrithe a bheith ag obair ina bpobail áitiúla."

Sonraí iomlána an mhaoinithe a fuair Fine Gall:

Ionaid Fiontar Fhine Gall

Ionad Bonn-Fhiontair = € 75,000

Pointí Ceangail Leathanbhanda Fhine Gall

CC Coill na nÚll = € 10,000

CC Liam Rogers Fhine Gall = € 10,000

CC Baile an Tirialaigh = € 10,000

CC Baile Lotrail = €10,000