FEIRMEOIREACHT, BIA, TEAGHLACH AGUS SPRAOI! Sceideal Bhlasanna Fhine Gall fógartha don 2-3 Iúil
D'fhógair Blasanna Fhine Gall, an seó contae is mó atá oiriúnach do theaghlaigh in Éirinn, a sceideal inniu, Dé Máirt an 7 Meitheamh 2022, agus tá sé níos mó agus níos fearr ná riamh! Beidh imeacht na bliana seo ar siúl Dé Sathairn an 2 agus Dé Domhnaigh an 3 Iúil, ag Newbridge House and Farm agus beidh rud éigin ann do gach duine.
Meallann Blasanna Fhine Gall 80,000 cuairteoir ar an meán gach bliain agus is é an príomhimeacht samhraidh é arna óstáil ag Comhairle Contae Fhine Gall, i gcomhar le Grúpa Feirmeoirí Fhine Gall agus Fingal Harriers. Tá clú agus cáil ar Bhlasanna Fhine Gall mar lá teaghlaigh a mbíonn siamsaíocht agus gníomhaíochtaí saor in aisce ar siúl ann do leanaí chomh maith le rogha leathan ceoil, bia agus siopadóireachta.
Agus í ag labhairt ag fógra an lae inniu, dúirt Méara Fhine Gall, an Clr. Seána Ó Rodaigh; “Bhí orainn briseadh a bheith againn mar gheall ar Covid le dhá bhliain anuas. Ach níor ghéill ár bhFoireann Imeachtaí tiomnaithe. Bhí a fhios acu go mbeimis ar ais, agus d'oibrigh siad go crua chun imeacht samhraidh atá oiriúnach do theaghlaigh a chruthú do gach duine."
Dúirt sí; “Tugann Blasanna Fhine Gall an chathair agus an tír le chéile chun bia, teaghlach agus spraoi a cheiliúradh. Agus is fiú go mór tábhacht Fhine Gall d'earnáil bia agus talmhaíochta na hÉireann a cheiliúradh. Is féidir le cuairteoirí a bheith ag súil le táirgí áitiúla a bhlaiseadh agus teicnící feirmeoireachta traidisiúnta agus nua-aimseartha, taispeántais madraí caorach, alpacaí, caoirigh agus muca a fheiceáil. Chomh maith leis sin, i mbliana, óstálfaidh Blasanna Fhine Gall triúr cáilitheoirí don imeacht seóléimní is mó le rá sa tír, Seó Capall Bhaile Átha Cliath an RDS."
Taispeánfaidh Farmer's Field, arna óstáil ag Grúpa Feirmeoirí Fhine Gall, scoth na n-ainmhithe feirme lena n-áirítear ranganna eallaigh, taispeántais madraí caorach, alpacaí, caoirigh agus muca. Léireofar modhanna agus teicnící traidisiúnta feirmeoireachta in éineacht le cuid den innealra feirme is nua-aimseartha agus is úrscothaí dá bhfuil ann. Ná caill na cearca, géanna, agus lachain ghlóracha nó an puball Gairneoireachta a bheidh lán de thorthaí agus de ghlasraí blasta a fhástar go háitiúil. Agus ar ndóigh, ní féidir cuairt a thabhairt ar seó den chineál seo gan triail a bhaint as bácáil bhaile agus cupán tae maith.
Beidh sé cinn de bhanracha i Limistéar Spraoi Teaghlaigh Keelings le gníomhaíochtaí do leanaí lena n-áirítear scileanna amharclannaíochta agus sorcais, ealaíona agus ceardaíocht, lámhchleasaíocht, agus cluichí traidisiúnta. Beidh aicsean agus siamsaíocht ar fáil do leanaí de gach aois. Ach tá limistéar ciúin ann freisin do leanaí agus do theaghlaigh a dteastaíonn beagán spáis uathu le linn a dturas. Beidh ceol agus siamsaíocht, bia, siopadóireacht agus spásanna chun do scíth a ligean sa Gharraí Daingean agus Fáilteachas.
Beidh an-tóir ar mharcaíocht capall agus seóléimneach i mbliana. Tabhair cuairt ar Limistéar Eachaíochta BMW Joe Duffy, arna óstáil ag Fingal Harriers chun féachaint ar iomaitheoirí sna bahbtaí cáilithe do Sheó Capall an RDS i mBaile Átha Cliath lena n-áirítear capaill rása, capaill marcaíochta, taobh-diallait na mban agus taobh-diallait idirmheánach. Is iad na seóléimneoirí iomráiteacha Shane McKenna, Conor Higgins agus Alice Copithorne a dhéanfaidh moltóireacht ar an gcomórtas. Cibé an bhfuil tú i do thosaitheoir nó suim agat i gcapaill le fada an lá, ní bheidh tú ag iarraidh an t-aicsean sa Limistéar Eachaíochta a chailleadh.
Dúirt Méara Uí Rodaigh; “Tá tábhacht mhór ag baint le hinbhuanaitheacht maidir le himeachtaí móra cosúil le Blasanna Fhine Gall. Mar chuid dár bhfeachtas Fine Gall Inbhuanaithe, táimid ag déanamh gach is féidir linn le spreagadh a thabhairt do dhaoine iompar poiblí a úsáid, nuair is féidir. Tá áthas orainn cead isteach saor in aisce a thairiscint chuig an ócáid do chuairteoirí a thagann de shiúl na gcos, ar rothar nó ar iompar poiblí. Níl anseo ach léargas ar a bhfuil le tairiscint ag Blasanna Fhine Gall. Mar sin, ná cailligí amach. Cuir an dáta i do dhialann, glaoigh ar do theaghlach agus ar do chairde agus cuir do thicéid in áirithe. Táimid ag obair go dian chun deireadh seachtaine iontach lán le spraoi a chruthú agus táimid ar bís fáilte a chur romhat!”
Chomh maith le cead isteach saor in aisce chuig an imeacht do chuairteoirí a thagann de shiúl na gcos nó ar iompar poiblí, tá Comhairle Contae Fhine Gall ag cur bus tointeála ar fáil as Baile Brigín, na Sceirí/Lusca, Sord agus Domhnach Bat/Port Reachrann. Ní mór áiteanna a chur in áirithe roimh ré ar https://marathoncoaches.ie/ agus ní chosnaíonn ticéad teaghlaigh ach €10. Má tá tú ag taisteal i gcarr, cuir do thicéad páirceála gluaisteán in áirithe roimh ré chun an luach is fearr a fháil Tá costas €15.00 nó €30.00 ar thicéid do mhochóirí ar an lá.
Téigh chuig www.flavoursoffingal.ie chun sonraí agus áirithintí iomlána a fháil agus íoslódáil an aip FingalConnect saor in aisce le haghaidh apple agus android chun an nuacht agus an fhaisnéis is déanaí faoi Bhlasanna Fhine Gall a fháil. Ná déan dearmad Blasanna Fhine Gall @flavoursoffingal a leanúint agus do ghrianghraif ón imeacht a phostáil leis an haischlib #flavoursoffingal ar ár gcainéil meán sóisialta: Facebook, Instagram agus Twitter.
Nótaí chuig an Eagarthóir:
Arna óstáil ag: Comhairle Contae Fhine Gall. Is muid an ceantar údaráis áitiúil is óige in Éirinn (bunaithe i 1994) agus tá breis is 300,000 duine ina gcónaí anseo. Is muid an contae is mó fáis in Éirinn; leis an daonra ag dúbáilt faoi dhó beagnach ó 1991 go 2016. Tá éagsúlacht cónaitheoirí agus tírdhreacha le fáil anseo. Is limistéar tuaithe, uirbeach, cósta agus fo-uirbeach muid. Tá pobail láidre sheanbhunaithe anseo a bhfuil a bhfréamhacha ag dul siar na céadta bliain, taobh le taobh le pobail atá ag teacht chun cinn agus táimid ag tnúth le todhchaí spreagúil. Faigh tuilleadh eolais anseo: www.fingal.ie/resident
Ag taisteal chomh fada linn:
- De shiúl na gcos nó ar rothar: spásanna páirceála tiomnaithe do rothair ar an láthair.
- Bus Tointeála: oibreoidh busanna tointeála réamh-áirithinte ó/go Baile Brigín, na Sceirí/Lusca, Sord agus Domhnach Bat/Port Reachrann. Caithfear ticéid bhus tointeála a chur in áirithe roimh ré ar an nasc seo agus cosnaíonn siad €10 ar theaghlach suas le seisear.
- Traein: Glacann sé cúig nóiméad siúl ó Theach an Droichid Nua go Stáisiún Traenach Dhomhnach Bat. Féach www.irishrail.ie chun sceideal a fháil.
- Bus Átha Cliath: Bealach 33b https://www.goaheadireland.ie le haghaidh amchláir.
- Carr: Is féidir ticéid don charrchlós a chur in áirithe roimh ré ar ráta laghdaithe €15 ar www.flavoursoffingal.ie. Tá costas €30 in aghaidh an chairr ar phasanna páirceála ar an lá, atá ar fáil ag oifig na dticéad.