Leathnú an Chláir LEADER Thuaithe i mBaile Átha Cliath fógartha.

Tá spreagadh mór faighte ag Pobail agus Fiontair Tuaithe i mBaile Átha Cliath leis an nuacht go bhfuil leathnú suntasach déanta ar an limistéar geografach atá incháilithe le haghaidh maoiniú a fháil faoin gClár LEADER.

Is clár maoinithe ag an AE é LEADER atá á riar ag Grúpaí Áitiúla Gníomhaíochta (LAGanna) agus tacaithe ag an Roinn Forbartha Tuaithe agus Pobail. Is é príomhaidhm LEADER geilleagar na tuaithe a neartú agus cáilíocht na beatha i gceantair thuaithe a fheabhsú. Díríonn LEADER ar chroíphrionsabail na nuálaíochta, na hinbhuanaitheachta, an chuimsithe shóisialta agus na hinmharthanachta geilleagraigh agus cothaíonn sé naisc le heagraíochtaí eile. Cuireann LEADER go mór le geilleagar na tuaithe, lenár bpobail agus lenár dtimpeallacht a chothú. Tá fás geilleagrach agus cruthú post bunriachtanach d’fhás na gceantar tuaithe.

Is iad na limistéir nua a bheidh le cuimsiú i gClár leathnaithe LEADER Tuaithe Bhaile Átha Cliath ná Baile Brigín, Na Sceirí, Port Mearnóg, Dúbóthar, Caisleán Cnuca-Cnoc Mhaolruain, Leamhcán Thuaidh, Gleann Cuilinn, agus a tSeanchoill-Ráth Michíl.

Dúirt Laurence Ward, Cathaoirleach Ghrúpa Áitiúil Gníomhaíochta LEADER Tuaithe Bhaile Átha Cliath, a dhéanann maoirseacht ar chur i bhfeidhm an chláir mhaoinithe, ‘Is cúis mhór áthais dom na hathruithe seo ar an limistéar incháilithe LEADER i mBaile Átha Cliath a fhógairt. Táimid ag obair le tamall anuas chun na limistéir ar féidir leo maoiniú LEADER a rochtain a leathnú agus anois tá sé seo bainte amach againn. Is mian liom aitheantas a thabhairt do thacaíocht mo chomhbhall ar an nGrúpa Áitiúil Gníomhaíochta ó Fhine Gall, Baile Átha Cliath Theas agus Dún Laoghaire Ráth an Dúin, agus don Roinn Forbartha Tuaithe agus Pobail freisin a chumasaigh na hathruithe dearfacha seo. '

Dúirt Eilish Harrington, Príomhfheidhmeannach Chomhpháirtíocht LEADER Fhine Gall, Comhpháirtí Curtha i bhFeidhm an Chláir go bhfuil ‘LEADER Tuaithe Bhaile Átha Cliath’ ar bís i dtaca le leasú na Teorainneacha Geografacha. Tabharfaidh maoiniú LEADER tacaíocht bhreise iontach agus luach breise do Ghrúpaí Pobail agus do Ghnólachtaí nua sna limistéir seo nach raibh incháilithe roimhe seo. Is am corraitheach é do Bhaile Átha Cliath Tuaithe agus tá géarghá ann don leasú seo agus fáilte roimhe. Táim féin agus m’fhoireann ag súil le tús a chur le hobair sna limistéir nua agus daoine/grúpaí/gnóthais a spreagadh chun teagmháil a dhéanamh linn le haghaidh tuilleadh eolais.

Dúirt Emer O’Gorman, Stiúrthóir Seirbhísí le Comhairle Contae Fhine Gall, Comhpháirtí Airgeadais an Chláir LEADER, ‘Tá fáilte mhór roimh an gcinneadh seo ó Ghrúpa Áitiúil Gníomhaíochta LEADER Tuaithe Bhaile Átha Cliath. Cruthaíonn cuimsiú na limistéar geografach nua seo deiseanna maoinithe nua a chabhróidh le téarnamh geilleagrach áitiúil i dtimpeallacht iar-COVID-19. Spreagfainn go láidir grúpaí pobail agus fiontair sna réimsí nua seo breathnú ar an gClár LEADER mar rogha. '

Dúirt Declan Ryan, Bainisteoir Grúpa Áitiúil Gníomhaíochta LEADER Tuaithe Bhaile Átha Cliath ‘Tá uainiú an fhógra seo don Chlár LEADER i mBaile Átha Cliath an-suntasach. Tá LEADER ag tnúth le go leor tionscadal nua a fheiceáil a bhfuil béim acu ar Phobail, ar Fhiontair agus ar Chomhshaoil ar féidir leo a chur ceantair áitiúla spreagadh a bhfuil géarghá leis tar éis bliain dheacair. '

Is féidir tuilleadh eolais faoi na roghanna maoinithe atá ar fáil tríd an gClár LEADER i mBaile Átha Cliath a fháil ag www.dublinruralleader.ie