Léiríonn an Plean Gníomhaíochta Nua in aghaidh Torainn gur ábhar imní fós é nochtadh torainn san oíche ag Aerfort Bhaile Átha Cliath
Leagann an Plean Gníomhaíochta in aghaidh Torainn d'Aerfort Bhaile Átha Cliath 2024-2028, atá foilsithe ag Comhairle Contae Fhine Gall, béim ar na gnéithe achrannacha a bhaineann le nochtadh torainn aerárthaigh ag an aerfort chomh maith le réimsí a shainaithint atá le feabhsú.
Deir an Plean, cé go bhfuil Aerfort Bhaile Átha Cliath ar an mbóthar ceart chun cuspóirí meántéarmacha agus fadtéarmacha an Chuspóra um Laghdú Torainn (CLT) arna leagan síos ag Údarás Inniúil um Thorann Aerárthaí (ÚITA) a bhaint amach, go bhfuil nochtadh torainn san oíche fós ina ábhar imní le líon na ndaoine a nochtar do leibhéil os cionn 55 dB Lnight níos airde i 2023 ná mar a bhí i 2019. Beidh measúnú de dhíth ar na saincheisteanna seo de réir an Achta um Rialáil Torainn Aerárthaí 2019(Aerfort Bhaile Átha Cliath) agus tá an próiseas seo ar siúl.
Éilíonn an NAO go laghdófar éifeachtaí díobhálacha torainn aerárthaigh sa mheántéarma agus san fhadtéarma i gcomparáid leis an staid torainn ag Aerfort Bhaile Átha Cliath i 2019. Éilíonn sé freisin, mar thosaíocht, nach sáróidh líon na ndaoine a nochtar do leibhéil os cionn 65 dB Lden agus 55 dB Lnight an líon a nochtar i 2019.
Áiríonn an Plean Gníomhaíochta in aghaidh Torainn forbhreathnú freisin ar chás torainn aerárthaigh sna pobail timpeall Aerfort Bhaile Átha Cliath, ag cur béime ar réimsí le feabhsú agus forbairtí féideartha amach anseo ag an aerfort a bhféadfadh tionchar a bheith acu ar leibhéil torainn amach anseo, ar nós athruithe ar bhearta bainistíochta torainn agus uasghráduithe bonneagair. Leagann sé béim ar an tábhacht atá ag comhairliúchán poiblí agus rannpháirtíocht geallsealbhóirí chun bearta bainistithe torainn a fhorbairt agus a chur chun feidhme ag an aerfort.
Iarrann an Plean Gníomhaíochta in aghaidh Torainn ar ÚABÁC, oibreoir Aerfort Bhaile Átha Cliath, gach ceann de na 17 mbeart maolaithe torainn atá i bhfeidhm ag Aerfort Bhaile Átha Cliath faoi láthair a chur i bhfeidhm.
Is é an Plean Gníomhaíochta in aghaidh Torainn 2024-2028 an dara plean gníomhaíochta in aghaidh torainn tiomnaithe a ullmhaíodh d’Aerfort Bhaile Átha Cliath agus tá sé bunaithe ar thorthaí na léarscáileanna straitéiseacha nochta torainn don bhliain athbhreithnithe ábhartha 2021, mar a cheanglaítear sa reachtaíocht. Mar sin féin, mar gheall ar thionchar na srianta taistil a bhaineann leis an bpaindéim dhomhanda COVID-19 agus athruithe oibríochtúla ag an aerfort, ní mheastar go bhfuil torthaí léarscáileanna straitéiseacha torainn 2021 ionadaíoch do chúrsaí torainn reatha in Aerfort Bhaile Átha Cliath. Ar an ábhar sin, forlíontar an Plean Gníomhaíochta in aghaidh Torainn le sonraí nochta torainn don bhliain féilire 2023, a léiríonn níos fearr an cursa torainn i ndiaidh COVID-19 agus an t-aerfort ag oibriú i bhformáid trí rúidbhealach.
Fuair Comhairle Contae Fhine Gall 119 aighneacht maidir le Dréachtphlean Gníomhaíochta in aghaidh Torainn Aerfort Bhaile Átha Cliath 2024-2028 le linn tréimhse sé seachtaine de chomhairliúchán poiblí i mí Mheán Fómhair agus i mí Dheireadh Fómhair.
Bunaítear an creat rialála le haghaidh plean gníomhaíochta in aghaidh torainn le Rialacháin na gComhphobal Eorpach (Torann Timpeallachta) 2018 (na Rialacháin) a thrasuíonn Treoir Eorpach 2002/49/CE (dá ngairtear an ‘Treoir maidir le Torann Timpeallachta’) i ndlí na hÉireann. Éilíonn na rialacháin go ndéanfaí léarscáileanna straitéiseacha torainn agus plean gníomhaíochta gaolmhar a chur ar fáil gach cúig bliana do na haerfoirt mhóra (a shainítear mar níos mó ná 50,000 gluaiseacht aerárthach in aghaidh na bliana).
Faoi na Rialacháin, tá an t-údarás aerfoirt d’Aerfort Bhaile Átha Cliath (ÚABÁC) freagrach as léarscáileanna straitéiseacha torainn a ullmhú agus sainmhínítear iad mar an Comhlacht Mapála Torainn agus tá Comhairle Contae Fhine Gall freagrach as Plean Gníomhaíochta in aghaidh Torainn Aerfort Bhaile Átha Cliath a ullmhú agus a athbhreithniú i ról an Údaráis um Pleanáil Gníomhaíochta.
Tá bainistiú torainn aerárthaigh ag Aerfort Bhaile Átha Cliath faoi réir creata rialúcháin rialuithe a bhunaítear ar an leibhéal idirnáisiúnta, Eorpach, náisiúnta agus áitiúil. Ag an leibhéal idirnáisiúnta, déantar cur síos ar na príomhrialuithe mar chuid de ‘Chur Chuige Cothrom’ na hEagraíochta Eitlíochta Sibhialta Idirnáisiúnta (EESI) i leith torann aerárthaigh. Ceanglaítear le Rialachán (AE) Uimh. 598/2014 go leanfadh ‘aerfoirt mhóra’ laistigh den Aontas Eorpach an Cur Chuige Cothrom i gcás ina sainaithníodh fadhb torainn. Tá éifeacht bhreise tugtha don Rialachán seo in Éirinn agus i gcás Aerfort Bhaile Átha Cliath tríd an Acht um Rialáil Torainn Aerárthaí (Aerfort Bhaile Átha Cliath) 2019.
Féach PleanGniomhaiochtaInAghaidhTorainn chun an Plean Gníomhaíochta in aghaidh Torainn agus na doiciméid tacaíochta a fheiceáil.