Preasráiteas Acadamh Ibeirneach Ríoga ar Flow le Vivienne Roche ag Áras an Chontae, Sord.
Bhí fíoráthas ar Chomhairle Contae Fhine Gall fáilte a chur roimh an ealaíontóir Vivienne Roche chuig Seomra na Comhairle, Áras an Chontae i Sord chun turas a thabhairt ar a saothar ealaíne Flow, (2002). Choimisiúnaigh Comhairle Contae Fhine Gall an dealbh rilífe mhórscála seo ina bhfuil gloine, plástar agus cré-umha mar chuid de thógáil Áras an Chontae, a dhear Bucholz McEvoy Architects. D’éascaigh Acadamh Ibeirneach Ríoga (RHA) an turas ag an am céanna le mórthaispeántas le Vivienne, Abridged, ag an RHA go dtí an 17ú Samhain.
Tugadh léargas iontach d’fhoireann Fhine Gall agus do lucht freastail an turais ar chruthú Flow, ó choincheap go críoch. Agus é comhtháite i gcreatlach ailtireachta an fhoirgnimh, tá an saothar ealaíne suíomhoiriúnaithe seo, a thomhasann 20 méadar faoi 7 méadar, bunaithe ar phríomhthéama an uisce; imeallbhoird atá múnlaithe agus athmhúnlaithe ag na taoidí. Déanann sí tagairt freisin do shreabhadh ama agus cumarsáide, rud a chomhlánaíonn feidhm na Comhairle ina bhfuil sreabhadh na faisnéise ríthábhachtach.
“....Aistríodh na loirg a dhéanann uisce ar ghaineamh nuair a thránn an taoide go gloine, plástar agus cré-umha. Tá neart tagairtí ag baint leis an teideal Flow – sreabhadh ama, an athraithe, an chomhrá nó cumarsáide agus an tsaoil. Ba é an dúshlán a bhí romham agus dealbh á dhéanamh agam do Sheomra na Comhairle ná iarracht a dhéanamh an solas a bhíonn de shíor ag athrú a nascadh le híomhá a d’fhéadfadh athrú a shú isteach agus a léiriú, le brí” a dúirt Vivienne Roche, agus í ag labhairt i Meitheamh 2002.
Chuir an saothar seo go mór le Seomra na Comhairle, is cuid lárnach den seomra í agus gné a bhfuil an-tóir uirthi sa Chomhairle, rud a théann i bhfeidhm ar gach cuairteoir chuig Áras an Chontae. Tá an cartún lánscála a chur ar chumas Vivienne an saothar seo a dhéanamh agus físeán a léiríonn próiseas a déantúsaíochta ar taispeáint faoi láthair in Abridged ag an RHA.
Dúirt Sarah O’ Neill, Oifigeach Ealaíon an Chontae, “Tá fíoráthas orm go bhfuil Vivienne Roche tar éis filleadh ar Sheomra na Comhairle chun an saothar ealaíne fíorspéisiúil seo a phlé. Cuairt thráthúil atá ann agus ceiliúradh á dhéanamh againn ar 30 bliain de Bhailiúchán Ealaíne Bardasach Chomhairle Contae Fhine Gall, sócmhainn chultúrtha thábhachtach, atá tar éis fás ó bunaíodh é i 1994 agus ina bhfuil breis is 300 saothar ealaíne. Tá Comhairle Contae Fhine Gall tiomanta do shaothair ealaíne nua a choimisiúnú agus a bhailiú agus d’fhorbairt fhorásach sna healaíona agus sa chultúr a chothú ar mhaithe le daoine a chónaíonn, a oibríonn agus a thugann cuairt ar Fhine Gall.”
Abridged le Vivienne Roche, RHA, 6 Meán Fómhair – 17 Samhain 2024. www.rhagallery.ie
