Soilsíonn Comhairle Contae Fhine Gall sé fhoirgneamh mar chuid den tionscnamh Lonraigh Do Sholas

Shoilsigh Comhairle Contae Fhine Gall sé fhoirgneamh aitheanta ar fud an chontae mar chuid den tionscnamh náisiúnta chun solas a lonrú ar son na ndaoine tinne, na n-oibrithe sa líne thosaigh agus aon daoine eile a bhfuil tionchar ag Covid-19 orthu.

I measc na bhfoirgneamh a soilsíodh, bhí ceithre fhoirgneamh oidhreachta - Caisleán Shoird, Caisleán Bhrí Mhór, Caisleán Ard Giolláin agus an Casino i Mullach Íde - chomh maith le Halla an Chontae i Sord agus na hOifigí Cathartha i mBaile Bhlainséir.

Mhol Méara Fhine Gall, an Comhairleoir Eoghan O'Brien an tionscnamh. Bhí sé i láthair nuair a soilsíodh Caisleán Shoird in éineacht leis an Stiúrthóir Forbartha Eacnamaíochta, Fiontraíochta agus Turasóireachta, Emer O'Gorman, agus baill foirne den Aonad Bainistíochta Éigeandála i gComhairle Contae Fhine Gall.

"Dar liom is smaoineamh iontach é solas a lonrú ar son na ndaoine ar fad a bhfuil tionchar ag an bpaindéim Covid-19 orthu. Cuireann sé teachtaireacht amach do mhuintir Fhine Gall agus muintir na hÉireann go bhfuilimid ag troid i gcoinne an víris seo le chéile," a deir an Méara.