Tacaíonn an Chomhairle le scannán ‘Dear Fingal’ trí mhaoiniú Éire Ildánach

Maoinithe trí chlár Éire Ildánach Fhine Gall atá á chomhordú ag Comhairle Contae Fhine Gall, taifeadadh an scannán, ar féidir a fheiceáil i sé phíosa ar leithligh nó i bpíosa foriomlán amháin ar ár gcainéal Youtube, i gCaisleán Shoird.

Léirithe agus stiúrtha ag David Gilna, tá léirithe sa scannán ó réalta an stáitse agus an scáileáin Ciara O’Callaghan, an drámadóir a bhfuil duaiseanna buaite aici Elaine Murphy, réalta ceoldrámaí West End Brian Gilligan, damhsóirí idirnáisiúnta nua-aimseartha Prodijig Nawal, Elabdri, Meadhbh Kennedy, Christen Mooney, Georgina Donovan, Kellie Morris, an t-ealaíontóir Glenn Matthews agus an t-amhránaí/scríbhneoir amhrán a bhfuil gealladh fuithi Muireann.

Chum Trisha O’Keefe an ceol agus bhí Louis Maxwell i bhfeighil na cineamatagrafaíochta.

Dúirt Méara Fhine Gall, an Comhairleoir David Healy: “Ba mhaith liom tréaslú le David a léirigh an scannán iontach seo le grúpa cumasach ealaíontóirí ó Fhine Gall. Tá fíoráthas orm go raibh David, trí  Chlár Éire Ildánach Fhine Gall, in ann scannán chomh iontach a léiriú ag taispeáint ealaíontóirí áitiúla den scoth agus mholfainn do dhaoine féachaint ar an sárscannán seo ar ár gcainéal Youtube.”

Dúirt Príomhfheidhmeannach AnnMarie Farrelly: ‘Tá saol ealaíne iontach agus bríomhar i bhFine Gall agus chonaiceamar daoine aonair agus grúpaí ag lorg bealaí nua chun nascadh lena lucht féachana. Is sampla de sin é an scannán “Dear Fingal” seo ina bhfuil scata iontach de thallann áitiúil agus ba mhaith liom tréaslú le gach duine a bhí páirteach ann as a gcuid léirithe dochreidte.”

Dúirt an Stiúrthóir Tithíochta agus Pobail, Margaret Geraghty: “D’oibrigh Comhairle Contae Fhine Gall go crua chun tacú le hearnáil na nEalaíon le linn na tréimhse Covid-19 trí raon tionscnamh ar nós meantóireacht, scéimeanna tacaíochta agus cúnamh deontais. Tá Clár Ildánach Fhine Gall bunaithe ar théamaí na féiniúlachta, an chultúir agus na saoránachta chun tacaíocht agus cuidiú a sholáthar do dhaoine aonair agus do ghrúpaí cruthaitheacha ó gach disciplín agus is cinnte go gcomhlíonann an tionscadal seo na prionsabail sin go léir.”

Dúirt an stiúrthóir agus an léiritheoir David Gilna: “Is seó é a cheiliúrann ealaíontóirí gairmiúla as Fine Gall ag taibhiú i Séipéal Chaisleán Shoird na 12ú hAoise a rinneadh athchóiriú air. Táimid ag iarraidh solas a shoilsiú sna hamanta dorcha seo d’ealaíontóirí. Aimsíonn na hEalaíona slí i gcónaí le hoiriúnú agus bhí mé an-bhródúil seó a stiúradh i gCaisleán mo bhaile dúchais le foireann aisteoirí agus criú den chéad scoth. Caithfear leanúint ar aghaidh leis an seó.”