An tAire Eamon Ryan TD, le Seachtain Gníomhaithe ar son na hAeráide Bhaile Átha Cliath a sheoladh go hoifigiúil maidin Dé Luain an 13ú Meán Fómhair ag dlr LexIcon, Dún Laoghaire.

Beidh an chéad Seachtain Gníomhaithe ar son na hAeráide i mBaile Átha Cliath ar siúl ón 13 go dtí an 19 Meán Fómhair 2021.

Dé Luain an 13ú Meán Fómhair 2021, seolfaidh Eamon Ryan TD, an tAire Comhshaoil, Aeráide & Cumarsáide agus an tAire Iompair, an chéad Seachtain Gníomhaithe ar son na hAeráide i mBaile Átha Cliath, a bheidh ar siúl ón Luan an 13 go dtí Dé Domhnaigh an 19 Meán Fómhair. Freastalóidh Méaraí agus Príomhfheidhmeannaigh ceithre údarás áitiúla Bhaile Átha Cliath ar an seoladh.

Beidh Seachtain Gníomhaithe ar son na hAeráide Bhaile Átha Cliath ar siúl ag am nuair a mheabhraítear dúinn an tábhacht leanúnach a bhaineann le gníomhú ar son na haeráide, agus tá ról tábhachtach ag ár gcathracha. Measann Clár Comhshaoil na Náisiún Aontaithe (UNEP) go dtagann thart ar 75% d’astaíochtaí CO2 an domhain ó na ceantair uirbeacha, agus iompar agus foirgnimh mar na rannpháirtithe is mó. Tá níos mó ná 10% de chónaitheoirí in Éirinn ina gcónaí i mBaile Átha Cliath agus is ó na hearnálacha cónaithe, tráchtála agus iompair a thagann na hastaíochtaí príomha i Réigiún na Cathrach.

Cuireann Tuarascáil um Athrú Aeráide 2021 an Phainéal Idir-Rialtasach ar an Athrú Aeráide (IPCC) le déanaí, dar teideal The Physical Science Basis, béim láidir ar an ngá le gach earnáil den tsochaí gníomhú go práinneach ar athrú aeráide. Chomh maith leis sin, d’fhoilsigh an Ghníomhaireacht um Chaomhnú Comhshaoil (EPA), Met Éireann (MÉ) agus Foras na Mara (MI) tuarascáil ar ‘Stádas Aeráide na hÉireann’ le déanaí. Is é tátal na tuarascála 'go bhfuil an fhianaise soiléir, ciallaíonn athrú aeráide domhanda go bhfuil Éire níos teo agus níos fliche'.

Tá níos mó ná 70 imeacht ar líne agus pearsanta beartaithe i rith Sheachtain Gníomhaithe ar son na hAeráide Bhaile Átha Cliath agus clúdóidh siad na téamaí Fuinneamh & Foirgnimh, Athléimneacht Tuilte, Iompar, Bainistíocht Acmhainní, Réitigh Dúlra-Bhunaithe agus Rannpháirtíocht Saoránach. Tá clárúcháin do gach imeacht ar fáil ar láithreán gréasáin DCAW21 www.dublinclimateactionweek.ie.

Tá an tseachtain á heagrú agus á seachadadh ag comhpháirtíocht Chomhairle Contae Dhún Laoghaire-Ráth an Dúin, Comhairle Contae Bhaile Átha Cliath Theas, Comhairle Cathrach Bhaile Átha Cliath, Comhairle Contae Fhine Gall, Codema - Gníomhaireacht Fuinnimh Bhaile Átha Cliath agus Oifig Réigiúnach Gníomhaithe ar son na hAeráide Bhaile Átha Cliath (CARO).

Tá ráite i gcomhpháirt ag Cathaoirleach Chomhairle Contae Dhún Laoghaire-Ráth an Dúin, Méaraí Chomhairle Contae Bhaile Átha Cliath Theas agus Comhairle Contae Fhine Gall, agus Ard-Mhéara Chomhairle Cathrach Bhaile Átha Cliath ‘Tá Réigiún Bhaile Átha Cliath ag gníomhú ar chúiseanna agus tionchair athraithe aeráide, agus tá athruithe dearfacha á ndéanamh againn. Tá údaráis áitiúla Bhaile Átha Cliath ag obair le chéile chun athléimneacht aeráide a thógáil, chun an Chathair a fheabhsú do na glúine atá le teacht. Ag croílár Sheachtain Gníomhaithe ar son na hAeráide Bhaile Átha Cliath tá an teachtaireacht go mbeidh ar gach duine againn roghanna tábhachtacha a dhéanamh anois, chun na spriocanna uaillmhianacha aeráide náisiúnta a bhaint amach go dtí 2030, 2050 agus ina dhiaidh sin, agus mar sin táimid go léir ag gníomhú le chéile’.

Ag labhairt dó thar ceann Phríomhfheidhmeannaigh údaráis áitiúla Bhaile Átha Cliath, dúirt Tom McHugh, Príomhfheidhmeannach Eatramhach dlr ‘Tá údaráis áitiúla Bhaile Átha Cliath agus ar fud na hÉireann, ag freagairt do riachtanais na bpobal áitiúil agus ag oiriúnú dóibh. Cuimsíonn sé seo cúiseanna agus tionchair an athraithe aeráide. Tá an-áthas orainn a bheith i gcomhpháirtíocht le Codema - Gníomhaireacht Fuinnimh Bhaile Átha Cliath agus Oifig Réigiúnach Gníomhaithe ar son na hAeráide Bhaile Átha Cliath (CARO) chun an chéad Seachtain Gníomhaithe ar son na hAeráide i mBaile Átha Cliath a chur i láthair. Léiríonn an tseachtain cur i bhfeidhm leanúnach cheithre Phlean Gníomhaithe Athraithe Aeráide údarás áitiúil Bhaile Átha Cliath. Is mian linn buíochas ó chroí a ghabháil leis an raon leathan cainteoirí agus láithreoirí atá ag comhoibriú linn ar ár gclár imeachtaí spreagúla agus éagsúla, creidimid go bhfuil rud éigin ann do gach duine’.

Is í fís fhoriomlán Sheachtain Gníomhaithe ar son na hAeráide Bhaile Átha Cliath 2021 - 'aird a tharraingt ar dhul chun cinn gníomhaithe ar son na haeráide Bhaile Átha Cliath dá saoránaigh agus ról ceannaireachta na gceithre údarás áitiúla i gcomhar le comhpháirtithe eile a léiriú'.

Is iad cuspóirí comhroinnte an tionscnaimh:

Dul chun cinn a thaispeáint maidir le cur i bhfeidhm cheithre Phlean Athruithe Aeráide údarás áitiúil Bhaile Átha Cliath, agus cur chuige réigiúnach i leith gníomhaithe ar son na haeráide;
Dul i dteagmháil le raon iomlán comhpháirtithe chun eolas a roinnt ar iarrachtaí agus ar nuálaíocht ar fud earnálacha;
Beart a chur le briathar agus léargas a thabhairt do shaoránaigh ar a bhfuil i gceist le hathrú aeráide;
An tionscnamh seo a chur chun cinn d’fhonn teagmháil iomlán a dhéanamh le cathracha AE agus idirnáisiúnta agus lenár gcomhghleacaithe aeráide; agus
Oidhreacht a chruthú ionas gur féidir leis an tionscnamh seo gluaiseacht ar aghaidh sa todhchaí ar bhealaí éagsúla.

Coinnigh suas chun dáta ar Sheachtain Gníomhaithe ar son na hAeráide Bhaile Átha Cliath 2021 ag #DCAW21

Is féidir leat féachaint ar Fhíseán Cur Chun Cinn Chlár DCAW21 ag: https://bit.ly/ClimateActionWeek21