Teastaíonn ó Fhine Gall go mBeadh Gach Duine Sábháilte ag Imeachtaí Spreagúla Oíche Shamhna
Agus Oíche Shamhna ag tarraingt orainn, tá neart imeachtaí spreagúla á n-ullmhú ag Comhairle Contae Fhine Gall chun a chinntiú go mbainfidh gach duine lántaitneamh as ceiliúradh na bliana seo. Agus ár n-imeachtaí iontacha saor in aisce de chuid Féile na Tine i gceithre shuíomh agus neart gníomhaíochtaí inár nIonaid Phobail agus Leabharlanna tá fuílleach le cinntiú go mbeidh Oíche Shamhna scanrúil ach sábháilte agat!
Mar chuid dá tionscnamh Oíche Shamhna Níos Sábháilte, tá fonn ar an gComhairle a chinntiú, chomh maith le réimse mealltach imeachtaí a thairiscint chun siamsaíocht a chur ar fáil do chónaitheoirí de gach aois, go ndéanfaidh daoine pleanáil chun cinn, go bhfanfaidh siad airdeallach agus go mbeidh siad sábháilte agus iad amuigh i measc na zombaithe, na n-amhailtí agus na gcailleach a bheidh ag tabhairt faoi shráideanna Fhine Gall an Deireadh Fómhair seo. Le tacaíocht ónár gcomhpháirtithe mór le rá, FSS Éireann, An Garda Síochána, agus Briogáid Dóiteáin Bhaile Átha Cliath, tá eispéiris chorraitheacha agus eolas sábháilteachta ríthábhachtach curtha le chéile againn chun a chinntiú go n-éireoidh thar cionn leis an Oíche Shamhna seo.
I mbliana tá os cionn 40 imeacht pobalbhunaithe a chuirfeadh an ghruaig ag seasamh ar do cheann ag tarlú ar fud an Chontae roimh an 31ú Deireadh Fómhair chun cabhrú le gach duine am iontach maith a bheith acu. Ó sheónna draíochta go dioscónna bréigéide agus sníodóireacht puimcíní, tá rud éigin againn do gach dúil dhamanta.
Tá leabharlanna áitiúla ar fud Fhine Gall ag dul i ngleic le spiorad Oíche Shamhna freisin le seisiúin scanrúla ealaíon agus ceardaíochta, scannáin Oíche Shamhna atá oiriúnach do theaghlaigh agus scéalaíocht le scéalta séasúracha. Ná caill an deis – cuir d’áit in áirithe roimh ré trí theagmháil a dhéanamh leis an leabharlann a óstálfaidh an t-imeacht. Tuilleadh eolais anseo: https://www.fingal.ie/autumnwinter-fingal-libraries-2024
Beidh Féile na Tine, a bhfuiltear ag súil go mór léi faoi lánseol oíche Déardaoin, an 31ú Deireadh Fómhair i gceithre phríomhshuíomh – Baile Brigín, Baile Bhlainséir, Sord agus Mullach Íde. Bain sult as rac-cheol lenár DJ Sceirdiúil agus ina dhiaidh sin beidh taispeántas draíochtúil tinte ealaíne ag 7:30 i.n.
Mar is gnáth, ná déan dearmad do chulaith Oíche Shamnha is fearr a chaitheamh agus tóirse a bhreith leat chun an oíche a ghealú! Tráthnóna fíordhraíochtúil a bheidh ann de spraoi scanrúil agus tínte ealaíne dochreidte. Is féidir na himeachtaí ar fad agus roinnt leideanna cabhracha sábháilteachta a fháil ar: https://www.fingal.ie/safer-halloween.
Ba mhaith leis an gComhairle a mheabhrú do chónaitheoirí go bhfuil cosc ar thinte cnámh agus dó dramhaíola agus go bhfuil siad mídhleathach. Caitheann Comhairle Contae Fhine Gall suas le €150,000 gach bliain ar ghlanadh agus deisiú damáiste a dhéanann tinte cnámh agus impíonn sí ar an bpobal teagmhais maidir le bailiú ábhair a thuairisciú trí fhoireann Cúraim Chustaiméirí na Comhairle ar 01 890 5000 nó trí ríomhphost a chur chuig:
Oibríochtaí Bhaile Brigín/Shoird: [email protected]
Oibríochtaí Mhullach Íde/Bhinn Éadair: [email protected]
Oibríochtaí Chaisleán Cnucha/Mhullach Eadrad: [email protected]
Ná déanaigí dearmad ar bhur bpeataí muirneacha! Coinnígí sábháilte istigh iad le linn imeachtaí Oíche Shamhna – is féidir le tinte ealaíne a bheith chomh scanrúil le taibhse dár bpeataí.
Beidh Maithiúnas Bliantúil Oíche Shamhna ar siúl arís. Glacfar le hábhair tí indóite (leapacha, toilg, doirse adhmaid 7rl.) saor in aisce ag Ionaid Athchúrsála Chomhairle Contae Fhine Gall; Inbhear, Sord agus Cúil Mhín do chónaitheoirí Fhine Gall (beidh cruthúnas seolta ag teastáil) ó Dé Céadaoin, an 23ú Deireadh Fómhair go Déardaoin, an 31ú Deireadh Fómhair.
Le haghaidh uaireanta oscailte agus tuilleadh eolais tabhair cuairt ar: https://www.fingal.ie/recycling-centres
Chun a chinntiú go mbeidh Oíche Shamhna thar barr agat, tá bileog eolais curtha le chéile ag Comhairle Contae Fhine Gall. Féach air ar ár gcainéil meán sóisialta ag https://www.fingal.ie/safer-halloween. Caithfear an leabhar draíochtúil seo a léamh le haghaidh ceiliúradh fíoriontach!
Spreagaimid na cónaitheoirí go léir lánsult a bhaint as na himeachtaí ceilúrtha agus cuimhneamh ar bheith sábháilte. Ná húsáid tinte cnámh mar ionad dumpála do dhramhaíl – is féidir leis an gcuid is mó d’earraí tí a bheith chomh toscaineach le posóid nimhiúil! Déan ceiliúradh go freagrach, agus le chéile, coinneoimid spiorad Oíche Shamhna beo.
Chun tuilleadh sonraí a fháil faoi imeachtaí Oíche Shamhna i bhFhine Gall téigh le do thoil chuig www.fingal.ie nó lean sinn ar Facebook nó Twitter - @fingalcoco.
Agus cuimhnigh, i gcás éigeandála glaoigh ar 999 nó 112 don Bhriogáid Dóiteáin láithreach.